2020 оны эхний хагас жил нүд ирмэхийн зуур өнгөржээ. Гэвч энэ хугацаанд хүн төрөлхтнийг цочроосон цар тахлын улмаас хүн бүрийн амьдралын хэв маяг өөрчлөгдсөөр байна. Хөл хорионы улмаас цэцэрлэг, сургуулиуд хамгийн түрүүнд үйл ажиллагаагаа зогсоож, хүүхэд багачууд гэртээ байх болсон нь тэднийг энэхүү аюулт өвчнөөс сэргийлэх хамгийн чухал арга юм.
Удаан хугацаанд гэрээсээ гарах боломжгүй болсон хүүхдүүд, эцэг эхчүүд, багш нар болон Харри Поттер хүүгийн адал явдалт зохиолч дуртай хэн бүхэнд зориулан "Харри Поттер" цувралын зохиолч Ж.К.Роулинг The Blair Partnership, Wizarding World Digital, "Харри Поттер" дэлгэцийн уран бүтээлийг хүргэсэн Warner Bros мөн Bloomsbury, Scholastic, Pottermore Publishing зэрэг ид шидийн ертөнцийн гайхамшгийг түгээхээр ажилладаг олон хамтрагчдынхаа тусламжтайгаар "The Harry Potter at Home" буюу http://www.harrypotterathome.com/ хэмээх цахим орчинд ид шидийн ертөнцөөр хязгааргүй аялах боломжтой цогц веб хуудсын төслийг эхлүүлсэн билээ.
Дэлхийн өнцөг булан бүрд суугаа Харри Поттер цувралд хайртай уншигч, үзэгч шидтэнүүдэд зориулсан уг цахим суваг нь хүн бүрд зориулсан сонирхолтой видео бүтээлүүд, асуулт хариулттай тоглоомууд, үнэгүй татаж авах боломжтой цахим болон сонсдог номууд, шидтэнүүдийн тухай онц сонирхолтой мэдээллүүдээс гадна өөр маш олон төрлийн бүтээлч ажлуудыг багтаасан сонирхолтой веб хуудас юм.
Сонирхуулахад, цувралын эхний ботийн нийт 17 бүлгийн уншлагатай видеог 7 хоног бүр www.harrypotterathome.com дээр тавигдахаас гадна зөвхөн аудио хэлбэрээр сонсох бол Spotify сувгаар дамжуулан багачууд, эцэг эхчүүд, багш нар болон ид шидийн ертөнцийн нэг хэсэг байхыг хүссэн хэн бүхэнд нээлттэй.
Өөрийн амжилт бүтээлээрээ танигдсан, ид шидийн ертөнцийн нэгээхэн хэсэг болсон жүжигчид, хөгжимчид, спортын алдартнууд мөн гэрээсээ Харри Поттер номын уншлагыг хийж эхэлсэн билээ. Харри Поттер ба Философийн чулуу номын эхний 7 бүлгийг зохиолын гол баатар хүүг дэлгэцнээ амилуулсан жүжигчин Daniel Radcliffe –с эхлээд , уг цувралын сонсдог номуудад дуу оруулсан Английн жүжигчин Stephen Fry, домогт хөл бөмбөгчин David Beckham, жүжигчин Dakota Fanning, Claudia Kim, Noma Dumezweni болон шидтэний ертөнцийн өөр нэгэн адал явдлын тухай өгүүлэх “Fantastic Beasts and Where to Find Them” киноны жүжигчин Eddie Redmayne нар унших ажээ.
Дэлхий даяар 500 гаруй сая хувь борлогдсон Харри Поттер хүүгийн гайхалтай адал явдлуудыг өгүүлэх энэхүү бүтээлээр дамжуулан ид шидийн гайхамшигт ертөнцийн баяр хөөр, аз жаргалыг дэлхийн өнцөг булан бүрд гэртээ суугаа хүүхдүүд, тэдний гэр бүл болоод зүрхэндээ итгэл найдварын гэрлийг тээж яваа хэн бүхэнд хүргэж, тэдний өмнө тэрхүү ертөнцийн хаалгыг дахин нээж өгөх нь бидний чин хүсэл билээ.
Харри Поттер болон түүний найзуудтай хамт 20 жилийг өнгөрүүлсэн эсвэл номынхоо эхний бүлгийг уншиж анх удаа энэ гайхамшигт аялалд хөл тавих гэж хэн бүгдийг халуун дулаанаар урин мэндчилье! Хүнд бэрх үед Хогвартсын хаалга үргэлж нээлттэй байх болно. Дэлхий даяар цар тахлын хар үүл бүрхэж, айдас түгшүүр дүүрэн байгаа хэдий ч ямар ч цаг үед ид шидийн ертөнц таныг хүлээж байдаг гэдгийг бүү мартаарай.
Бид ямар ч хүнд цаг үеийг хамтдаа даван туулж чадах болно.
СЭТГЭГДЭЛ